Una’ia e le Palemia le pulea ma fuafua lelei o aseta a Samoa o loo i totonu o Niu Sila

Ua una’ia e le Palemia o Samoa, Laaulialemalietoa Leuatea Polataʻivao Fosi Schmidt, le Ofisa o le Komesina Maualuga o Samoa i Niu Sila ina ia faaaogā ma le tatau, aemaise o le pulea ma fuafua lelei meatotino poo aseta a le malo o loo iai i totonu o Niu Sila nei.

I lana malaga mai i Aotearoa, o lea na ia asia ai foi le Ofisa o le Komesina Maualuga i Ueligitone, ma feiloai atu ai i le Komesina Maualuga, Afamasaga Faamatalaupu Toleafoa, ma le aufaigaluega o le Ofisa, ma o lea na maua ai le taimi e faasoa ma talanoaina ai galuega faakonesula ma le puleaina lelei o aseta ma meatotino a le malo.

Na saunoa le Palemia e lē gata e tatau ona faaaogā nei meatotino mo auaunaga i tagata Samoa, ae tatau foi ona silasila i itu e mafai ona maua mai ai tupe maua mo le Malo, e ala i le lisiina atu o nofoaga ma ofisa ma vaega e mafai ona inivesi iai mo le alualu i luma. 

Na ia faamamafaina o le pulea lelei o meatotino i atunuu i fafo o le a fesoasoani e una’ia ai tulaga lelei o le tamaoaiga o Samoa ma faamanuiaina ai tupulaga o le lumana’i.

Puna o Faamatalaga: https://www.facebook.com/share/p/19FN6zmPV8/