O le mae’a lauina o le faai’uga a le Faamasinoga Maualuga ua faamaonia ai moliaga e fitu o se alii sa avea ma malu o le malo ma ia umia ai le tulaga faaleoleo o le satini, le susuga Laauli Magic Talataina, ua taotaotua mai ai ma se fe’au tāua mai le afioga i le tama’ita’i Faamasino o le Faamasinoga Maualuga le Afioga Leutele Niavā Mata Tuatagaloa, i le Matāgaluega o Leoleo, Falepuipui ma le Toe Fuata’ina.
O solitulafono sa tuua’ia ai Laauli Magic Talata’ina ua faamaonia ona moliaga e aofia ai le faiaiga faamalosi i se tama’ita’i malu o le malo sa i lalo o lana vaaiga a o ia ta’ita’ia se tasi o tiute a leoleo.
Ua faamaonia foi isi ona moliaga o le faiaiga i se tulaga solitulafono ma moliaga e 4 o le faaoolima matagā.
Na tutupu solitulafono e māfua ai ia moliaga ia Aperila o le tausaga e 2024, a o ta’ita’i e lē ua molia le sifipo i le vaega o auaunaga lautele le general policing.
Sa finau lē ua molia sa loto malie lē na aafia peita’i o mau a leoleo na tuuina atu e aofia ai ma le tama’ita’i leoleo sa ia faaulu le tagi o loo ta’ua ai, sa faia le gaioiga i se tulaga faamalosi ma ua ioeina e le faamasinoga le mau a lē na aafia.
O le silasila a le faamasinoga i gaioiga sa faia e lē ua molia ua manino ai, o se tu ma se aga o loo tupu i totonu o le matāgaluega o le faaaogā e nisi o loo mautofi i tulaga sinia o ia tulaga e mailei ma faasufi ai tama’ita’i leoleo e le’i leva ona galulue poo junior officers i le faufauga e faatupu ai se gaioiga e talepe ai le faaaloalo, ma aga tausili e tausia ai le va nonofo o alii ma tama’ita’i leoleo uma o loo tautua ma galulue i totonu o le matāgaluega.
O le paolo sa malu ai lē na aafia i lona faatuatuaina o lē ua molia o lona ta’ita’i o se tasi o vaega ogaoga i le silasila a le faamasinoga i lana faai’uga.
O le fautuaga ua aumai i le taunuuga o lenei matāupu tau faamasinoga o soligatulafono, ua faatonuina e le faamasino le tuuina atu o se kopi o le faai’uga i le Sui Komesina ma le pulega faatonu o le Matāgaluega o Leoleo, Falepuipui ma le Toe Fuata’ina e silasila iai.
O le aso 4 o Setema e toe fofogaina ai lenei matāupu mo loia e tuuina atu folasaga faai’u ma se lipoti a le ofisa faanofo vaavaaia mo le faia o se tapenaga a le faamasinoga i se faasalaga.
O moliaga uma ua faamaonia o faasalaga o loo aiaia o le falepuipui.
