O le Aso Gafua o lenei vaiaso o le a toe faaauau ai le tagofia e le Faamasinoga Maualuga o le talosaga a James Tuisavailuu Atua ma Fred Oliva Junior Papalii i le la finauga e ala ia la loia e tatala i tua e faatali ai se aso e su’esu’eina ai o la moliaga e 30 a leoleo, e faasino i tupe eleelea poo money laundering.
O le Aso Faraile ua mavae na tagofia ai e le Faamasinoga Maualuga le talosaga a ia alii e to’alua ae o loo tetee leoleo e tatala i tua ae taofia i le vaaiga a leoleo i le falepuipui i Tanumalala.
O māfua’aga o loo faagasolo pea su’esu’ega a leoleo, ma le mau a leoleo e ono faalavelave i la’ua i molimau a leoleo.
O James ma Fred o loo molia i aafiaga o tupe eleelea ona o sootaga i le faalavelave i Vietnam ua molia ai alii talavou e to’alua mai Samoa o loo taofia e leoleo o lea atunuu, ma e le’i toe maua se faamatalaga mai leoleo i Samoa i se tulaga i feutana’iga ma leoleo o Vietnam lea na ave ai fesili mo ni tali mai alii talavou o le atunuu o loo taofia i lea atunuu.
