Ua amana’ia le tautua a se faia’oga i Aukilani i Saute ona o ana galuega i le una’ia o a’oa’oga faa-Māori ma le lagolagoina o fanau e iai aafiaga tumau o le soifua, aemaise i latou e aafia i le ma’i ua ta’ua o le autism.
O lea tama’ta’i o se alo o Samoa e suafa ia Tavai Tupaea, e mai Falealili ma o sē ua matua’i lelei lava lana tautala i le gagana Maori e pei foi ona lelei lana tautala i le gagana Samoa.
O loo avea nei o ia ma faia’oga i le Te Wharekura o Tāmaki ki te Tonga i Manurewa, ma e faamauina le galue malosi o lea alo o Samoa e fesoasoani i fanau i lo latou ola a’oa’oina i totonu o se si’osi’omaga e faavae lea i le aganuu ma le gagana Māori.
Ta’ua i ripoti a o le’i aga’i atu e amata a’oa’oina fanau i a’oga tulagalua, sa galue o ia i le Te Atawhai Kōhanga Reo, ma e faapea o i lea na amata ai ona faaosofia lona tagata e fesoasoani i fanau e iai aafiaga tumau o le soifua; o lona faanaunauga ia maua uma e fanau le avanoa e a’o’oga ai, inclusive education.
Faailoa i ripoti ma faasalalauga, e lē gata ina fiafia tele lea tama’ita’i e fesoasoani i fanau e a’oa’o le aganuu Maori, ae ua telē foi lona sao i le faaolaolaina o lea aganuu e tauala atu i se tasi o faatasiga ma tauvaga tele i totonu o Niu Sila ua faaigoaina o le Kapa Haka, e pei ona ia tausiniō ai i le kairangatira mo se tasi o vaega iloga o le Te Iti Kahurangi mai Waikato.
Sa faamanino o Tavai e mai se aiga e iloga i le taaloga lakapi, ma ua faaalia o ona uso o nisi iloga i le taaloga ma na tausiniō i taaloga o le lakapi pa’i a le atunuu.
Puna o Faamatalaga: https://www.facebook.com/share/r/1EXmnUseBM/
