Na tutusa ‘ai o le taaloga mata’ina a le ausoka a Niu Sila, le All Whites, ma le ‘au a Iran i le la ulua’i taaloga i le taamilosaga soka o le Ipu a le Lalolagi 2026, lea na faia i le aoauli ananafi i Los Angeles.
Na tutusa le taaloga e taufai 2 ‘ai a le ‘au, ma ua toe oo ai nei Niu Sila i se tulaga maualuga i le lalolagi i lea faagatama talu mai le 16 tausaga talu ai, ma ua faamauina ai foi ma le igoa o le alii o Eli Just i le talafaasolopito o lea taaloga, o ia na kikiina uma sikoa e lua mo le ‘au a Niu Sila i lea taaloga mata’ina i le aoauli ananafi.
Na sikoa e Just ‘ai ta’itasi mo le All Whites i ‘afa uma e lua o le taaloga ma tutusa ai ‘ai ma le ‘au a Iran lea o loo tulaga 65 i le faasologa o ‘ausoka a le lalolagi, o se tulaga o loo maualuga atu ai nai lo le All Whites a Niu Sila.
O le ulua’i fitu minute talu ona amata le taaloga, ae kiki ai loa e Just le polo ma mua’i tau ‘ai ai le All Whites ma e silia ma le 20 minute talu ona muamua pea Niu Sila, ae faato’ā maua le ulua’i sikoa a Iran mai lana defender le alii o Ramin Rezaeian i le tusa lena ua 32 minute talu ona amata le taaloga.
E uma le ‘afa muamua o loo tutusa i le ta’i 1 ‘ai o ‘au uma e lua, ma na foi mai le ‘afa lona lua ua amata ona malosi le osofa’i a Iran ma toe maua ai le isi a latou sikoa, ae sa finau pea Niu Sila ma toe kiki ai e Just le isi a latou sikoa, ma uma ai lea taaloga i le tutusa o ‘ai e ta’i 2 a ‘au uma e lua.
O le isi taaloga a le All Whites a Niu Sila o le a sosoo ai, o le la taaloga ma le ‘au a Aikupito, lea o le a faia i Vancouver i le Aso Gafua o le vaiaso fou.
Puna o Faamatalaga: https://www.rnz.co.nz/news/sport/598329/football-world-cup-2026-all-whites-draw-with-iran
