Ua faamanino mai nei e le alii Palemia o Niu Sila, Christopher Luxon, latou te lē talia le tuu atu o se isi fesoasoani mo le kalapu a le Moana Pasifika.
Faamatala e le ta’ita’i o le malo, o lona iloa e leai se tagata totogi lafoga e toe mana’o e faaalu a latou tupe e faaolaina ai ma faatumauina ai pea le iai o lea kakapu.
Mo le silafia o le asō le ogatotonu o lenei vaiaso na faaoo mai ai le faai’uga a le NZ Rugby e tusa ai ma le latou faai’uga i le matāupu a le Moana Pasifika, ma o lea na faamanino mai ai lo latou lē taliaina e faaauau ai le auai o le kalapu e tausinio i le taamilosaga a le Super Rugby Pacific i le tausaga a sau 2027.
Ae na faamanino e le sui o le NZ First, Vaovasamanaia Winston Peters, sa telē lava lona faanaunauga e maua se tali ae o se fesoasosni mo le ‘au, pe ana telē se avanoa e tuuina atu e galue ma sa’ili ai.
Faailoa e Peters, sa iai nisi o paaga na ia mafaufau e talanoa ai e pei o Iapani ma isi, ona o lona manatu e matua’i telē lava le tāua o le iai o le ‘au, e lē gata i le itu faaleaganuu ae o le tamaoaiga mo atunuu e pei o Samoa ma Tonga.
Ta’ua e lē ta’ita’i o le NZ First, o se faitoto’a lea i le saga faamausalī ai o paaga ma atumotu o le Pasefika, ma ia faamanino pe faafefea ona faatino se taamilosaga ae o se tauvaga e taula’i i le Pasefika ae leai se ‘au tuufaatasi mai le Pasefika?
Faaalia foi le lē fiafia o Winston Peters i le faai’uga a le New Zealand Rugby i le faaoo mai ai o le latou faai’uga ae le’i mae’a lelei feutana’iga i fesoasoani tau tupe.
E ui i nei faafitauli, o loo faamautū mai e le NZ Rugby o loo tatala lava le faitoto’a i le Moana Pasifika e auai atu ai i taamilosaga o i luma, ma ia mautinoa foi i latou ua fuafua e fesoasoani i le ‘au ina ia maua atu le silia ma le 15 miliona o le tupe e mafai ai ona mautū vaega uma o le kalapu a ia manino ma mautū se fuafuaga ma faigafaavae faapisini a le kalapu.
Puna o Faamatalaga: https://www.rnz.co.nz/news/sport/618841/if-i-only-had-time-winston-peters-saw-hope-for-moana-pasifika-deal
