Ua faamaonia mai nei le faamavae ai o lē sa avea ma Minisita o le Kapeneta a le faigāmalo a le Leipa, i tausaga talu ai, Stuart Nash, mai lona avea ma sui tauva o le vaega faaupufai a le New Zealand First.
Faamanino mai ua faamavae lea sui tauvā, ona ua tele ni faitioga a o ni atugaluga a le mamalu lautele e tusa ai ma sana tusitusiga sa faia e faatatau lea i se tasi foi o sui faipule a le National, le tama’ita’i o Katie Nimon.
I manatu o le to’atele o ni tusitusiga ua faailoa ai le faailoga tagata o le Stuart Nash ia Katie ona o taimi ma masina na mālōlō ai lea faipule i le mae’a tuueseeseina ai o lea tama’ita’i ma se tagata fou, poo lana fanauga.
O faamatalaga a Nash, na ia faitioina ai lea tama’ita’i, ma ia lalau ai, o Katie o se faipule aupito i paiē lea i lona iloa, talu ai le umi tele o ana mālōlōga (maternity leave) a o lea na faaauau lava ona totogi i masina uma ia na nofo ai i le fale.
Mo le silafia, i ripoti mai le NZ Herald na faamauina e 9 masina na mālōlō ai le sui faipule, ae i le toe a’e mai i le na o le vaiaso ae toe mālōlō lea tama’ita’i mo le masina atoa.
Na tuuina mai e Stuart Nash sana faatoesega, ma ia ta’ua e maualuga lona tilotilo i mātua faigaluega ma e le’i fuafuaina e ono liliu pe faauigaina faapea e le lautele ana faamatalaga.
Ma o lea ua ia manatu ai e sili ona solomuli mai lona tauva ai, ona ua telē se aafiaga ua iai nei ana taumafaiga.
Na saunoa le Palemia o Niu Sila, Christopher Luxon, e lē mafai ona avea Nash ma Minisita pe afai e toe filifilia lana faigāmalo, ae na ta’ua e le ta’ita’i o le Leipa, Chris Hipkins, e lē talafeagai ma e faailoga tagata ia saunoaga.
Na tali Katie Nimon e na o le sefulu vaiaso sa mālōlō ai mai galuega, ae sa faaauau pea ona tautua lona itumalo i le taimi atoa.
Puna o Faamatalaga: https://www.nzherald.co.nz/nz/politics/christopher-luxon-rules-out-stuart-nash-from-future-government/5QIUTHNVLBBDZER2YJUBOLRXKA/
