Ua amatalia nei tiute tauave o le afioga Vui Clarence Nelson ua filifilia e na te tauave le tofiga faalefaavae o le Komesina o Sulufa’iga mo le umi e 6 tausaga.
O le Aso Gafua o lenei vaiaso na amata ai ona galue le Afioga Vui Clarence Nelson i le tofiga ina ua mae’a ona faatautō i le sauniga sa auai atu iai le Palemia, o le Fofoga Fetalai ma ta’ita’i o le malo.
O le ‘ava faatali na faafeiloa’i ai le Komesina o Sulufa’iga e le pulega ma le ‘aufaigaluega a le ofisa o le Komesina o Sulufa’iga.
E pei ona silafia o le mae’a o le tautua a lea tamalii i le tofiga Faamasino ina ua mālōlō litaea i le masina o Iuni, na faailoa ai e le Fofoga Fetalai i taualumaga talu ai nei a le fono aoao faitulafono, le filifilia o le Afioga Vui Clarence Nelson i le tofiga o le Komesina o Sulufa’iga.
Ua to’atolu ia te ia Komesina o Sulufa’iga ua filifilia e le Ao o le Malo e ala i le fautuaga a le Palemene.
