O tagata malaga uma mai Samoa e ulufale i le teritori o Amerika Samoa ua faatapulaa nei le aofa’iga o ni taumafa e mafai ona tauaveina e se tagata malaga.
E oo foi i fuālaau ma vai faafoma’i e fia faaulufale e se tagata malaga e tatau ona faailoa lelei ia tulaga i se faailoga poo se label, ma e lē mafai ona talia ia vaega pe a lē usita’ia lea aiaiga.
Ua na o le sefulu lava ituaiga eseese o taumafa e mafai ona faaulufale e se tagata malaga.
O se faata’ita’iga o se afifi o se taumafa, se apa inu, ma se faguvai.
O le a lē talia ni tulaga tau taumafa e fafao faatasi i se apa poo se container, ma e oo lava i se faamomoli o ni taumafa e faaui aga’i i Samoa ma le faamoemoe e faaulufale atu i Amerika Samoa e tatau ona usita’ia lea aiaiga.
O se faasalalauga faalaua’itele mai le Matāgaluega o le Soifua Mālōlōina ma le vaega o loo puipuia le si’osi’omaga o le teitori o loo faailoa ai lea ta’iala mo tagata malaga mai Samoa.
E māfua ona o le fia puipuimalu o Amerika Samoa mai oloa e faaulufale atu e lē saogalemu, ma e le’i faatulafonoina aemaise e le’i tuuina iai ni faailoga e iloa ai poo labels.
