Ua faamaonia mai nei i ripoti a le RNZ, ua malie se tasi o ta’ita’i o le kegi a le Highway 61 Motorcycle Club i Ueligitone e tuuina atu ana meatotino e silia ma le $414,000 lona tau aofa’i ina ua mae’a ma manuia le finau a leoleo i lalo o le tulafono o tupe maua mai solitulafono poo le vaega ua ta’ua o le pursued proceeds of crime, ina ua faamaonia uma ona moliaga e fesoota’i atu i fuālaau faasāina.
Na faasala Peter William Evans i le falepuipui i le tausaga e 2016 ona o lona auai i le faatauina atu o le methamphetamine ma isi fuālaau faasāina faapea lona auai i gaioiga faasolitulafono faufau faatasi, organised criminal group.
Na maua e leoleo le tele o tinoitupe, tupe mai faletupe, taavale ma se uilaafi Harley-Davidson, e iai le talitonuga na maua mai i gaioiga faasolitulafono.
Faaalia le tele o tausaga o faatino fetuuna’iga ma le faamasinoga, ma o lea ua malie le alii o Peter William Evans e tuuina atu i leoleo, ana meatotino, o tinoitupe, o seleni mai faletupe faapea tupe na maua mai le faatauina atu o taavale ma isi gaioiga faasolitulafono.
Ta’ua i ripoti, e lē gata i lea tulaga ae ua faatonuina Evans e na te totogiina atu le tusa ma le $185,800 i totonu o le lima masina; a leai o le a talosagaina e leoleo le faatauina atu o lona fale i Miramar ina ia maua lea tinoitupe.
Mo le silafia o tupe e maua mai i nei meatotino o le a fesoasoani atu lea i polokalame e taofia ai soligatulafono, fesoasoani i polokalame toe fuata’ina mo ē ua aafia i le tulafono ma le tele o isi polokalame a leoleo i le puipuiga o le atunuu.
Puna o Faamatalaga: https://www.rnz.co.nz/news/crime-and-justice/743099/convicted-wellington-drug-dealer-peter-william-evans-to-forfeit-assets-worth-414-000
