Ua lē talia e le Faamasinoga Maualuga le talosaga a le faipule o Faleata 3 le tofa Lealailepule Rimoni Aiafi, mo se faatagaga e toe iloilo pe apili ai le faai’uga a le Faamasinoga Faaitumalo na fofogaina ia Aperila o le tausaga nei, le faai’uga lea a le tama’ita’i faamasino sinia o lea faamasinoga le afioga Talasa Atoa Saaga, sa su’esu’e ai mau o moliaga sa tuua’ia ai le Palemia ma isi tagata e to’alima.
O le Aso Tofi o le vaiaso nei na faailoa ai lea faai’uga tusitusia a le afioga i le faamasino o Justice Rhys Harris ma faailoa ai atugaluga o le faamasino i le solia e le loia na tuuina atu le talosaga a le sui faipule, o ala faaletulafono o loo lima ta’ita’iina ai le faatinoga o galuega a le faamasinoga i le tuuina atu o se matāupu mo le su’esu’eina ma faia iai faai’uga.
O atugaluga o le afioga Rhys Harris ona sa silafia e le loia e leai se faatagaga a le Loia Sili poo leoleo na finauina moliaga e apili ai le faai’uga, ae sa tuuina atu lava.
Ua faaalia ai e le faamasino o loo manino aiaiga o le tulafono, ua na o le Loia Sili o loo iai le malosi’aga faaletulafono e talia ai se talosaga apili i matāupu tau soligatulafono, ma e tusa foi pe iai se ioega a le Loia Sili i le talosaga ua tuuina atu e faalēaogāina lava ma taofia lona su’esu’eina.
Sa fesiligia le lesitala sinia o faamasinoga o le Ofisa Sili foi o lea matāgaluega i sona finagalo.
Le susuga Papalii John Taimalelagi Afelē o le lesitala sinia o faamasinoga, ma o ia foi o le faauluuluga o le Matāgaluega o Faamasinoga ma le Faafoeina o Matāupu tau Faamasinoga.
O loo totoe nei le isi o talosaga a le faipule o Faleata 3 e su’esu’eina i le aso 4 o Setema.
O le talosaga lea o loo finau ai e faia se iloiloga faaletulafono poo se judiciary review o le faai’uga a le Loia Sili e lē faia se isi iloiloga poo se apili o le faai’uga a le faamasinoga faaitumalo.
