O le lē taunuu o le faatautoga o le Komesina o Sulufa’iga i le ulua’i taimi na faatulaga e faatino ai lea faamoemoe, ina ua mae’a talia e le Palemene le filifiliga o le afioga Vui Clarence Nelson e tauaveina lea tofiga faalefaavae, na faailoa e lea tamalii i lana saunoaga i le Aso Gafua na faataunuu ai lana faatautoga, na lafo ai e nisi ni tala i luga o upega tafa’ilagi ma faauiga sesē ai lona malaga i fafo i se fonotaga tāua sa avea ai ma sui o Samoa ma tolopō ai le faatautoga.
Faaalia e le Komesina o Sulufa’iga i lana saunoaga, o se tasi lea o faafitauli ua aafia ai aiā tatau a tagata o le faaaogā sesē o le social media poo fesoota’iga televavave i luga o upega tafa’ilagi, ma faatupu vevesi ai i le va o tagata.
O se tasi lea o vaega o le a silasila iai lona ofisa auā o lea auaunaga a le malo o loo feagai foi ma le puipuia o aiā tatau a tagata.
Le afioga Vui Clarence Nelson, o le Komesina o Sulufa’iga ua amata i le vaiaso nei ona tiute i lea tofiga faalefaavae.
