Ua tāpā nei e le ofisa o le komisi o faigāpalota tagata palota e ono afe fitu selau e le’i faia a latou palota i le faigā filifiliga tele a le atunuu ia Aokuso o le tausaga ua mavae, ina ia oo atu i le ofisa e feiloa’i ai ma faailoa atu māfua’aga sa lē usita’ia ai lea aiaiga o le tulafono o faigāpalota o le tausaga e 2019.
E 101 afe 981 tagata sa lesitala mo lea palota tele, peita’i o loo faailoa i faamaumauga e 26 afe 876 tagata e le’i lesitala ae ua agavaa e palota.
Ua faailoa i le faasilasilaga a le ofisa o le komisi o faigāpalota e ao i le to’atele o tagata palota ua faailoa lautele o latou suafa i le lisi o le ‘au lē palota, ona oo atu ma se tusi poo ni faamaumauga e faailoa ai se māfua’aga poo ni māfua’aga na māfua ai ona lē usita’ia le Vaega 63 o le tulafono o faigāpalota.
O itumalo palota uma e 51 o loo iai o latou tagata palota sa lē usita’ia lea aiaiga o le tulafono o faigāpalota, ma ua aiaia foi faasalagatupe mo i latou.
O le salatupe pito maualuga e 2 afe tāla pe a lē faia le lesitala ina ua agavaa e avea ma tagata palota i se itumalo.
O loo aiaia i le tulafono o faigāpalota le faasalalau o suafa o tagata e le’i palota pe a tuana’i le 12 masina talu ona mae’a se palota sa sa’ilia ai sui usufono o le Palemene.
