Ua faailoa ai nei e le pulega o le Lakapi Samoa le filifilia o le ta’ita’ifono o le komiti faafoe o le lakapi a lo tatou atunuu le tofa Namulauulu Papalii Leota Sami Leota e avea ma sui o Samoa i le World Rugby Council poo le fono faatonu o le pulega o le taaloga lakapi a le lalolagi.
O se filifiliga ua faailoa i se pepa o faamatalaga mai le Lakapi Samoa, o se faailoga o le amana’ia e le lakapi a le lalolagi o le tausisia e Samoa o aiaiga o le tulafono faavae o loo pulea ma faafoe ai lakapi.
O se faailoga foi o le maualuga o le tulaga o loo faatino ai e Samoa le pulea o le taaloga.
O se filifiliga o le a faaauau ai pea ona lagona le leo o Samoa i tonufai o le atina’e o le taaloga lakapi.
Faaalia e le ta’ita’ifono o le komiti faatonu o le lakapi a Samoa o le filifiliga e lē ona o se tagata, ae o se faailoga o le amana’ia o ē na mua i malae ma i latou sa āsaina le gasū o le taeao i le atina’eina o le lakapi i lo tatou atunuu.
