Ua faaulu atu i le faamasinoga le tagi o moliaga o faiga faaālatua e māfua mai i le palota laitiiti a Safata 2 lea na toe filifilia mai ai le afioga Tuia Fuatogi Pu’a Letoa ua avea nei ma sui lagolago o le vaega faaupufai o le Faatuatua i le Atua Samoa ua Tasi.
Ua faamaonia mai e le Ofisa Sili o le Matāgaluega o Faamasinoga ma le Faafoeina o Matāupu tau Faamasinoga o le Aso Faraile na te’a nei na faaulu atu ai lea tagi tau palota e le sui sa tauva tuto’atasi le susuga Leleua Suataga Aso.
Ua faaalia i faamaumauga a le faamasinoga, e 6 moliaga o loo tuua’ia ai e lē ua faauluina le tagi tau palota le sui na manumalo.
O ia moliaga e fesota’i i tupe ta’i afe selau tālā na folafola e lē ua molia i ni tagata palota ma faatosina ai le latou filifiliga e palota i le afioga Tuia.
O ia tupe e pei ona silafia o se vaega o le taui sefulu miliona tālā mai Niu Sila na autū i aafiaga o le soifuaga masani o tagata Safata ona o le faalavelave na goto ai le manuao o le Manawanui i gataifale o lea itumalo.
O loo faaalia i le tagi, o le va o le aso muamua o Me ma le aso muamua o Iulai na faatino ai le gaioiga faaālatua a o lumana’i le palota laitiiti a Safata 2.
