Ua tuuina mai nei faamaumauga fou a le Pulega o le Eletise poo le Electricity Authority, ma ua māua ai o le kamupani o le Genesis Energy lea ua matua’i to’atele tagata ua tuua lea auaunaga i totonu o le tausaga.
E silia ma le 35,000 tagata le tuufaatasiga i numera o ē na faaaogaina lea auaunaga ua agai ese mai le tausaga talu ai seia oo mai i le faaaiuga o le masina o Iuni o le lenei tausaga.
Faamauina i ripoti a le leitio faavaomalo a Niu Sila, e 9,000 ua aga’i ese mai le Nova Energy, ta’ua ua maitauina foi le aga’i ese o tagata poo paaga mai auaunaga a le Manawa ma le Mercury.
Ae i faamaumauga ma ripoti a le pulega, ua molimauina le siitia o le numera o tagata e faaaogāina le auaunaga o eletise a Contact Energy, Electric Kiwi faapea le Meridian.
Ta’ua o le Contact o loo maualuga ana numera o tagata ma paaga mai lea lisi o auaunaga.
Ta’ua i iloiloga a le ‘au su’es’ue i lea matātā faaeletise, o le māfua’aga ua pa’ū ai le Genesis Energy, ina ua faamuta se tasi o a latou fuafuaga ua faaigoaina o le Frank Energy, o se vaega na patino i tau taugofie o le eletise, e pei o lea na una’ia ai le to’atele o tagata e sa’ili isi kamupani e taugofie.
Peita’i, fai mai le Genesis o nei fuainumera e māfua mai i le tuufaatasia o ana kamupanī i lalo o le igoa e tasi ma o loo taula’i pea le latou vaai i le fesoasoani i aiga i tulaga o le tuuitiitia o tau o le eletise.
Puna o Faamatalaga: https://www.rnz.co.nz/news/personal-finance/723771/the-power-company-losing-the-most-customers
