O faafitauli ua lipotia le feagai ma tagata faigaluega faavaitaimi o loo maua avanoa e galulue ai i Niu Sila i lea polokalame, ua lipotia ai le faailoa e lea malo o ni suiga o le a faatino i aiaiga o ia galuega i le isi lua tausaga o muamua nei.
O se tasi o ia suiga o le avanoa e talosaga ai tagata faigaluega faavaitaimi i se visa e sa’ili ai se isi galuega e faaauau ai ona galue ma nofo ai pea i Niu Sila i totonu o le ono masina, pe afai ae tula’i mai ni faafitauli i le galuega sa saini muamua ai lana konekarate.
O faafitauli ia e pei o le leaga o fale e faamautū ai, poo se faafitauli foi i le totogi pe afai ua lē tausisia e se kamupanī aiaiga o lona totogi sa tatau ona maua.
Ua faailoa lea fuafuaga i se lipoti a le leitio a Niu Sila ma faailoa ai o le Aso Lua o le vaiaso nei na faailoa ai e le Minisita o matāupu tau femalagaa’iga a Niu Sila lea fuafuaga.
E lē tau faailoa nisi o tulaga faaletonu sa aafia ai tagata mai le Pasefika e aofia ai Samoa o loo maua ia avanoa faigaluega i le polokalame o galuega faavaitaimi ma o le māfua’aga lea o le faia o ia suiga.
O se vaiaso ua mavae sa faia ai se fonotaga tele i Niu Sila sa talanoaina ai lea polokalame ma sa auai ma le usugafono a Samoa sa ta’ita’ia e le Minisita o le Matāgaluega o Alamanuia ma Leipa, lea sa ia asia ai faatasi ma le ta’ita’i o le tatou malo nofoaga o loo faamautū ai o tatou tagata o loo galulue i le polokalame.
