Ua fai si lē fiafia o nisi o faipule Ausetalia ma upuia le tama’ita’i faipule o Pauline Hanson i lana malaga i Europa ma ana faamatalaga na faia ai e faatatau ia Ausetalia.
E pei ona silafia o Hanson o le ta’ita’i o le vaega faaupufai a le One Nation ma ao iai i sana faigāmalaga i le Atu Europa sa faatalanoa ai e le ‘aufaasalalau i matāupu e aofia ai Ausetalia aemaise lava i le matāupu e faatatau i tagata faimalaga mai i le atunuu.
Ua faailoa se finagalo o le alii Palemia o Ausetalia Anthony Albanese i ia faamatalaga ma ia ta’ua ai o le amio faaalia a Hanson i lana malaga lea i Europa ua lē talafeagai aemaise ua malaga atu i ia atunuu ma fai ai faamatalaga i tagata ma ta’u maualalo ai Ausetalia.
Fai mai Albanese o Ausetalia o le atunuu aupito sili lea i le lalolagi ma o loo momoo le lalolagi i le ituaiga society ma mafutaga ua fausia i le atunuu aemaise o auaunaga ma o tulaga ia e ao ona faia ai faamatalaga pe a ia malaga i atunuu i fafo, siitia i luga Ausetalia.
Sa upuia foi e le ta’ita’i o le Itu Agai, Angus Taylor, Hanson, fai mai a ia i le feiloa’iga ma Tusitala, o le pati a le One Nation o le faaaliga a le tagata e to’atasi ma e lē agavaa e ta’ita’i ma e leai foi ni faiga faavae e mafai ona aveesea mai ai Ausetalia mai le tulaga pagātia o iai le tamaoaiga o le atunuu.
Puna o Faamatalaga: https://www.nine.com.au/australia-news/pm-slams-pauline-hanson-denigration-of-australia-europe-trip-20260720-p60gq8.html
