Ua faamauina nei le faaalia ai e tama’ita’i Pasefika i Niu Sila le moomia ona faatino ai o a’oa’oga e uiga i le kanesa ma auaunaga faalesoifua mālōlōina e talafeagai lea i tu ma aga i fanua o le Pasefika.
O ni faamaumauga nei na māua mai i se su’esu’ega na faatino lata mai nei, ma ua iloa ai e lē o maualuga se iloa ma se malamalama lelei o tama’ita’i i gasegase e ono aafia ai le to’atele o i latou po ua aafia ai foi nisi.
O le su’esu’ega a le Iunivesite o Otago na aofia ai tama’ita’i Pasefika e 94 ma iloa ai e to’atele e lē o malamalama i ituaiga kanesa eseese e pei o le kanesa o le taufale, ma isi, e ui o tama’ita’i Pasefika e maualuga le avanoa e aafia ai.
Na saunoa le ta’ita’i o le su’esu’ega, Polofesa Gabi Dachs, e mana’omia le faia ma ia faateleina taimi e faatino ai a’oa’oga mo le mamalu lautele ina ia o latou malamalama ma manino i faailoilo poo āuga o le kanesa ma vave vaai loa se foma’i mo se fesoasoani ma ni togafitiga.
Na faailoa foi e i latou sa auai i le su’esu’ega le mana’omia o le taula’i o su’esu’ega i auala e puipuia tagata mai le kanesa, o le vave maua o le gasegase, ma le tausiga o le soifua manuia o tagata a o faia togafitiga.
Ua fautuaina e le ‘au su’esu’e le saunia o faamatalaga i gagana Pasefika, faatasi ai ma ata ma auala faigofie e malamalama ai tagata.
Na latou faailoa foi e to’atele tama’ita’i Pasefika na faaali manatu i le tāua tele o togafitiga faaonaponei ma fesoasoani faaleaganuu faapea ai ma le itu faaleagaga i taumafaiga o le feagai o le tagata ma le gasegase o le kansea.
Puna o Faamatalaga: https://www.rnz.co.nz/news/pacific/728582/pacific-women-in-nz-call-for-improved-cancer-education-and-more-culturally-responsive-healthcare
