O Saina le atunuu ua taula’i iai le silasila a le malo i le taimi nei pe maua ai se isi lavea’i e lē gata i le togafitia o gasegase ae o le maua ai o vai ma fuālaau.
Ua faailoa i le nusipepa o le Savali o loo pulea e le malo, le malaga atu ai i lea atunuu o le Minisita lagolago o le Matāgaluega o le Soifua Mālōlōina, o le Ofisa Sili ma nisi o ofisa sinia o lea matāgaluega e faatalanoa vaega tonu e mafai ai ona faamautū le fesoasoani mai a lea malo tele o se pā’aga totino a Samoa.
E pei ona silafia o Saina le tasi o atunuu o loo maua ai le fesoasoani o foma’i ae sa fesoasoani foi lea malo i se aumalaga o foma’i e faia ta’otoga faapitoa lea sa latou faia lea galuega ina ua mana’omia e Samoa lea fesoasoani ina ua tuai ona maua se foma’i faapitoa e faia ta’otoga e sa’ilia ai māfua’aga o maliu o ni tagata sa su’esu’eina e leoleo le māfua’aga.
O loo iai le fuafuaga a mae’a Saina, ona malaga lea o le Minisita lagolago o le soifua mālōlōina ma lana ‘aumalaga i le atunuu o Initia o loo iai nisi o falema’i o loo ave iai gasegase mai Samoa e togafiti ai.
Ua siitia tupe faaalu a le malo i le tausaga i le polokalame o gasegase e auina atu i fafo mo togafitiga, ma o se isi lea o māfua’aga o loo sa’ili’ili atu ai i ia atunuu mo se fesoasoani.
