O le asō ua tula’i ai i luma o le Faamasinoga Faaitumalo o Ueligitone, se tasi o tagata iloga ma tautua i taaloga, e tali i ona moliaga, ona o se matāupu na tula’i mai i Rongotai i le faai’uga o le vaiaso talu ai.
Faamauina le tele o moliaga o loo molia ai lea tagata, ta’ua e aofia ai lona tetee atu i leoleo, o le faaoo manu’a ma le loto iai, lona faaoo manu’a i se taifau sosogi a leoleo ma le moliaga i le taufaasese.
Ta’ua i ripoti a le RNZ, na māfua ona tula’i mai lea matāupu, talu ai feseesea’iga e faapea na lē totogia ai e lea tagata lona pasese i le vaveao o le Aso Toona’i.
Na taofia faapagota e leoleo lea tagata, i le mae’a ai ona aafia po ua ū e le ta’ifau a leoleo; o lea na faamauina sa togafitia o ia i le falema’i.
Faailoa e leoleo e le’i moomia ona faia ni togafitiga i le ave taxi, faapea foi le ta’ifau a leoleo.
O loo taofia pea ona faailoa faalaua’itele le suafa o lē o loo aafia i lenei matāupu.
Ae i le mae’a faatautaia ai o ulua’i taualumaga o lenei matāupu, ua tatala i tua lē o loo aafia i le tulafono, i lalo o tuutuuga o le tatala i tua (bail).
O le a toe tula’i lea alii i luma o le faamasinoga i le aso 17 o Aokuso.
Puna o Faamatalaga: https://www.rnz.co.nz/news/crime-and-justice/805862/high-profile-sports-person-bitten-by-police-dog-faces-series-of-charges
