O le faamuamua a le faalapotopotoga o le faaputuga tupe o le lumana’i manuia o tagata le NPF, o loo ave i le malupuipuia o tupe o saofaga o loo teu faafaigaluega i lana pulega, a o faia ai se su’esu’ega ma se iloiloga faalotoifale a le pulega o le faalapotopotoga i saofaga ma isi ana aseta.
Ua faailoa lea tulaga i se pepa o faamatalaga mai le pulega o le NPF ina ua mapuna mai i fafo i nisi o lipoti ma faasalalauga i upega tafa’ilagi, i le iai o ni sa’ili’iliga o loo faia i le aafia o ni tupe a le faalapotopotoga i ni gaioiga solitulafono ua masalomia.
O su’esu’ega o loo faia o loo aofia ai ma le toe silasila o le faalapotopotoga i le vaega o fesoota’iga faatekonolosi o loo teu malu ai ana faamaumauga.
Ua lē mafai ai e le pulega ona toe aumai faalaua’itele se isi faamatalaga ona o su’esu’ega o loo faagasolo.
Ua faailoa e leoleo e lē o iai se latou su’esu’ega o aga’i i se tulaga faapea i le NPF, ae mo le auaunaga masani a le NPF i le talosagaina o nonōgatupe ma le siakiina o saofaga ma faamanuiaga mo le ‘au fai saofaga o loo sologa lelei pea e aunoa ma se faaletonu.
