O le taua i le va o Amerika ma le atunuu o Iran lea ua toe taofia na aumai ai faalaua’itele e lea malo le fautuaga i ona tagatānuu uma i le lalolagi e mataala ma mataalia i soo se taimi i atunuu o loo aumau ma galulue ai.
O le tulaga lea sa molimauina i le malaga mai i Samoa o le Amepasa fou o lea malo mo Samoa ae faamautū i Niu Sila, i le faatinoina o le galuega o le puipuiga.
Sa fautuaina e le matāgaluega o leoleo le atunuu aemaise i taavale ina ia tuu avanoa i magāala uma e uia e le Amepasa ma leoleo faafeao ina ia sologa lelei femalagaa’iga a le Amepasa e aunoa ma se faalavelaveina.
O tusitala foi sa valaaulia mo se feiloa’iga ma le Amepasa sa aiaia lelei tulaga uma e ao ona usita’ia mo le puipuiga.
E lē masani ai ona faatino sea tulaga i isi sui o le malo o Amerika sa tauaveina le tofiga Amepasa.
O le afioga i le Ao o le Malo na tauaao iai tusi taualoa o le tofiga o lea sui filifilia o le malo tele o Amerika mo Samoa, le alii Amepasa o Jared Novelly.
O loo faatulaga foi e feiloa’i atu i ta’ita’i o le malo a o le’i toe taliu i Ueligitone i Niu Sila o loo faamautū ai.
