E to’alua pailate ae to’atolu le pasese e aofia ai se tagata faigaluega o le kamupanī vaalele o le Samoa Airways na malaga i le vaalele twinotter o lea kamupanī na aafia i se faalavelave i le malae vaalele i Fitiuta i Manu’a i le taeao o le Aso Lulu i Samoa ae o le Aso Lua o le vaiaso nei i Amerika Samoa.
Ua faailoa e le kamupanī vaalele na tupu le faalavelave ina ua tulaueleele le vaalele lea na tifa i tua ma tu i se pupuvao i tafatafa o le malae e taunuu ma o ese ai vaalele poo le runway.
O ata na pu’eina e nisi i le taimi o le faalavelave o loo molimauina ai lea tulaga.
E ui ina tula’i mai lea faaletonu i se tasi o malaga a se vaalele laitiiti a le Samoa Airways i le Motusa, peita’i e leai se soifua na aafia ae ua na o se tagata faigaluega a le kamupanī vaalele na malaga ai, sa faamanu’alia lona aao e faasino lea i se tasi o ona vae.
Ua faailoa e se molimau o le vaalele na aafia, o se tasi o vaa o le Samoa Airways na faato’ā mae’a talu ai nei ona faia iai galuega faaleleia i le tino ma ona afi, ma toe vali lea sa faaalu ai le 22 miliona tālā a le kamupanī vaalele o le Samoa Airways.
Peita’i o le māfua’aga o le faalavelave o loo su’esu’eina i le taimi nei.
Faaalia e le kamupanī vaalele sa vave ona faatino le auaunaga a le kamupanī e tali atu ai i le faaletonu na tupu i le vaalele.
E faato’ā manino le faaletonu na māfua ai ona oso i tua le vaalele ma le auala e taunuu ma alu ese ai, pe a mae’a su’esu’ega o loo faagasolo.
Mo le silafia o vaalele o le Samoa Airways o loo tautuaina malaga i le va o motu o Tutuila ma le Manu’atele.
O le tautua foi a le kamupanī vaalele o loo faia malaga i le va o Samoa ma Ameika Samoa.
E tolu vaalele laiti twinotter o le Samoa Airways, o le lua o ia vaa ua mae’a ona toe faaleleia e aofia ai ma le vaa na aafia i le faaletonu i le vaiaso nei.
