I le oo mai ai o lapata’iga i le ono aafia ai o manulele i le atunuu i le faama’i o le H5N1 bird flu i Ueligitone, o lea ua faatino ai e se tasi o kamupanī tele e faatauina atu i le atunuu fuāmoa, le Mainland Poultry, fuafuaga ae o se laasaga e puipuia ai moa mai le aafia.
I ripoti e lata i le 40% le tele o fuāmoa e sapalai e lea kamupanī i le atunuu, ma ua faamanino e le Mainland Poultry ua na o ni auala e fesoasoani atu e puipuia ai moa mai le oo i ni oooga tugā ona o lenei faama’i a o faasolo sa’ili’iliga ma su’esu’ega a le Ministry of Primary Industries (MPI) i tulaga o le pepesi ai o le H5N1 bird flu.
Saunoa le Pule Sili o le Matāgaluega o le MPI, John McKay, e ui e lē o faamaonia le maua ai o nisi o pamoa i le atunuu, ma o loo saogalemū pea moa ma fuāmoa mo le taumafaina; ae o loo silasila toto’a ma māta’itūina moa e tele ina taaloa i le fanua poo free-range hens, lea ua faailoa e maualuga lava le avanoa e aafia ai.
Na ia ta’ua foi le galulue o le aufaigaluega o le kamupanī i le faai’uga o le la vaiaso i nofoaga o loo malu ai moa, ina ia taofia le ulufafo atu o moa ina ia nonofo saogalemū i totonu o fale, a o faamalosia pea tulaga uma o puipuiga o le atunuu mai faama’i ma meaola faalafuā (Biosecurity).
I le taimi nei e na o le lua manulele o le vao ua faamaonia le aafia i le H5N1 ma e lē o iai se faamaoniga ua sosolo atu le siama i le tele o pa moa.
Ua fautuaina foi le mamalu o le atunuu ina ia aua ne’i tagofia se manulele, aemaise manulele ua mamate.
Puna o Faamatalaga: https://www.nzherald.co.nz/nz/bird-flu-nzs-largest-egg-supplier-mainland-poultry-puts-500000-layer-hens-into-lockdown-as-precaution/FHX2WPDNLBFTTDAFVFUZOX2KMI/
