O loo faaauau nei su’esu’ega a le malo e iloilo ai vaega ua faaleagaina i le mae’a lūlūina o se mafui’e e 5.9 lona malosi lea na aafia ai Te Anau i le po anapo.
Na ta’ua e le pulenuu o Southland, Rob Scott, e leai ni faaletonu tetele na maua i nofoaga o loo faasolo atu ai vai taumafa faapea ai ma nofoaga e aga’i iai otaota lafoa’i poo wastewater i le po anapo, o le Aso Tofi lea, peita’i ua iai lipoti mai nisi o aiga i nisi o vaega o o latou fale ua aafia e lē o ni aafiaga tetele.
Ua tapunia mo se taimi lē tumau le auala o le State Highway 94 i le va o Te Anau ma Milford Sound, a o faia su’esu’ega i alalaupapa, alāvai, ma nofoaga pe na tula’i ai ni eleele solo ma pa’ū’ū ai ni maa, a o le’i toe tatala mo feoa’iga a le lautele.
O loo su’esu’e foi e le National Emergency Management Agency (NEMA) le māfua’aga na lē mafai ai ona faaaogāina le itualu o upega tafa’ilagi a le Civil Defence i le mae’a lūlū ai o le mafui’e.
E pei ona ta’ua na tuuina mai i tua se fautuaga ma lapata’ia tagata lautele ina aga’i ese mai o latou nofoaga ona o se galulolo e aafia ai nisi o faaitu o South Island’s West Coast.
Māua i ripoti na mulimuli ane faalēaogāina lea lapata’iga ina faamaonia e leai se galulolo e oo mai.
Saunoa le tasi o tagata su’esu’e mai le GeoNet, Bill Fry, e ui ina malosi le mafui’e ae le’i lava lona malosi e ono tulai mai ai se galulolo.
Na ia fautuaina foi tagata o loo nonofo i nofoaga e tu lalata i le gataifale, afai ae umi atu i le minute le taimi e lē lūlū ai le mafui’e, faanatinati loa ona ō ese mai o latou fale ae aga’i atu i nofoaga maualuluga e aunoa i le faatalitali i ni fautuaga ma lapata’iga e tuuina mai e le auaunaga o faalavelave tutupu faafuase’i.
Faaalia e le NEMA e o faatasi lava le māta’itūina o tala lata mai o auaunaga o faalavelave tutupu faafuase’i, o lipoti i luga o leitio faasalalau ma le mafaufau fetāla’i o le tagata e fetuuna’i ai gaioiga e faatino i taimi e tula’i ai se mala faalenatura.
Puna o Faamatalaga: https://www.rnz.co.nz/news/emergencies/728324/live-daylight-will-allow-damage-assessment-after-strong-te-anau-quake
