E ui e lē o iai se ‘ausoka patino a le Pasefika o tauva i le Ipu a le Lalolagi o le soka i lenei tausaga, lea o le a faagasolo i le Iunaite Setete, Kanata ma Mexico, ae to’atolu ni tama taaalo a le ‘ausoka a Niu Sila, le All Whites, o i latou e mai ni tupu’aga Pasefika o le a taaalo i lenei taamilosaga.
O le tasi o se alii Rarotonga, o Max Crocombe, ma le isi to’alua e iai o la tupu’aga Samoa, le alii o Marko Stemanic ma Michael Boxall.
O le alii Samoa o Marko Seufatu Nikola Stemanic, o se alo e faasino i le afio’aga o Solosolo i le Anoamaa, o loo taalo i le tulaga o le Midfield.
O le tausaga e 2021 na ulua’i taalo ai Marko i le All Whites, i le lona 36 ai lea o ana taaloga mai le 38 taaloga faavaomalo ua taalo ai mo Niu Sila, ma na ia ulua’i kapeteniina le All Whites i le faai’ui’uga o le tausaga talu ai, i se taaloga faaleuo faavaomalo na fetaui ai ma Ecuador.
Na fanau ma soifua ane le alii o Marko i Ueligitone i Niu Sila, a o le’i see atu i Europa i le 18 o ona tausaga ma o loo taalo ai nei i nisi o kalapu soka i Europa, e ui o lea ua auai mai e taalo mo lona atunuu mo le Ipu o le Lalolagi i lenei tausaga.
O le isi alii Samoa o Michael Joseph Boxall, e tupu’aga mai le afio’aga o Apia i Samoa.
O loo taalo Boxall o se Defender mo le All Whites, ma ua faalua ona taalo Boxall mo Niu Sila i taaloga a le Olimipeka, i le 2008 ma le 2024.
Ua faa 63 ona taalo Boxall i taaloga faavaomalo, ma sa tatao lana ulua’i sikoa i se taaloga faavaomalo ma le ‘au a Niu Kaletonia, i le taaloga OFC World Cup e agavaa ai le ‘au mo le Ipu o le Lalolagi, ma na manumalo ai le All Whites i lea taaloga ma agavaa ai nei mo le Ipu o le Lalolagi.
O le tausaga e 2011 na ulua’i taalo ai Boxall i le All Whites, ma sa taalo o ia i le ‘au lea na manumalo i le OFC Nations Cup i le 2016.
O le tausaga e 2024 na taalo ai Boxall i lana taaloga lona 50 mo le All Whites faasaga ia Mexico, ma o ia na kapeteniina lena ‘au.
O le asō i le 1pm i le aoauli le ulua’i taaloga a le All Whites ma atonu o le a taaalo uma ai nei alo o le Pasefika aemaise alo e to’alua o Samoa.
