A o faasolo ai taaloga o le Ipu o le Lalolagi mo le taaloga o le Soka a alii, ae o se tala fiafia le oo mai o faamatalaga ma ripoti, o le sainia atu lea e le kalapu Soka a Pale i Farani (Paris FC) o se alo o Samoa.
O le alii o Aquila Peleseuma e 11 ona tausaga ma sa ola mai o ia i Ueligitone ma o loo aumau nei i Farani. Ma o le a ua patitia lona maua ai o le avanoa e taalo agai i tulaga faapolofesa ina sainia e le kalapu a le Paris FC.
Faamatala na amata ona iloa ma amana’ia le lelei ma le maoa’e o le taleni ma le agavaa o lea tamaitiiti a o faatino so latou taaloga faasamasamanoa ma ana uo i Rouen.
Ta’ua na iai se tamā o sana faauo na matamata ma iloa le talenia o Aquila, o lea na ia una’ia ai matua o le tamaitiiti e resitala i se kalapu, ma o iina na amata iloa ai e le toatele le maoa’e o taumafaiga ma le taalo o lea alo o Samoa.
I le maliega i le sainia ai o lea talavou i le kalapu a le Paris FC o le a maua ai le avanoa a Aquila e agai atu i le polokalame atia’e poo le development pathway i le tausaga fou, ao lei tuu atu o ia mo le academy system a lea kalapu.
Faamauina le lagolagoina foi e le kalapu o vaega uma o le aoaoga a lea alo o le atunuu ma le aga atu i ana taumafaiga i le soka.
Faaalia le agaga faafetai ma le fiafia tele o Aquila mo le avanoa ma ia ta’ua ai e lę o Polenisia uma e maua ia avanoa i nei tausaga.
Faamauina foi le faafetaia e matua o lenei avanoa mo le atalii, ma na o la ta’ua o faamanuiaga ua maua mai ona o le finau ma le lē faalogologotiga.
Puna o Faamatalaga: https://www.rnz.co.nz/news/pacific/614344/not-all-polynesians-can-do-what-i-can-11-year-old-samoan-footballer-signs-with-paris-fc
