Ua tatala i tua alii e to’alua o James Tuisavailuu Atua ma Fred Oliver Junior Papalii i le tuana’i o taofia i le vaaiga a leoleo i le falepuipui i Tanumalala talu mai le masina o Me o le tausaga nei.
O le Aso Gafua na faia ai le faai’uga a le Faamasinoga Maualuga e tatala i tua, ina ua faasolomuli i tua e leoleo le latou tetee e tatala James ma Fred i ni aiaiga e faatali ai le aso o le la faamasinoga i moliaga o le faaaogā o tupe eleelea i ni gaioiga solitulafono.
Ua faatonuina James e nofo i Faleasiu ma saini i le ofisa o leoleo i Faleolo, ae o Fred ua faatonu e nofo i Siumu ma saini i le ofisa o leoleo i Poutasi Falealili.
Ua faatonuina ai e le faamasinoga le loia a leoleo ina ia tapena se pepa faaletulafono e taofia ai ona tuua Samoa e ia taulele’a se’i mae’a ona su’esu’e o la moliaga i le Faamasinoga Faaitumalo ma le Faamasinoga Maualuga.
O su’esu’ega a leoleo i ni sootaga i Samoa i le solitulafono fasioti tagata sa tula’i mai i le atunuu o Vietnam o loo tuua’ia ai ni alii talavou se to’alua mai Samoa na malaga i lea atunuu o loo māfua ai ona faia moliaga a leoleo ia James Atua ma Fred Papalii.
