Ua lē mafai e loia a leoleo ona finauina moliaga i le aofa’iga e ono lea sa tuua’ia ai sui e to’alua o le polokalame faasalalau i luga o upega tafa’ilagi le Maota o Viiga, ina ua lē malaga mai i Samoa lē na faauluina le tagi o le molimau autū foi lea a leoleo.
E ta’i tolu moliaga sa molia ai e leoleo Toleafoa Sa’ia Toleafoa ma le faletua o Ainuu Iliganoa Savaiinaea Toleafoa.
O ia moliaga solitulafono o le faia o faasalalauga sesē ma le faasoesa e faaaogā ai fesoota’iga faatekonolosi ma sa molia i la’ua i aiaiga o le tulafono o soligatulafono e ta’ua o le criminal libel.
O le ave ai i tua o moliaga ua lē faaauauina ai ona su’esu’e mau o le tagi a leoleo ma ua faamamā ai ma suafa o i la’ua sa tuua’ia.
Ua sa’oloto ai foi e toe tuua Samoa mo Ausetalia ma toe faaauau le la polokalame.
Sa maua lo la avanoa e tali ai i fesili a nisi o tusitala sa auai i le valaauina o le faamasinoga i le taeao o le Aso Lua o le vaiaso nei.
Sui faasalalau o le polokalame i luga o upega tafa’ilagi le Maota o Viiga, afioga le faletua o Ainuu Iliganoa Savaiinaea Toleafoa.
