A o su’esu’eina e le pulega o le Iunivesite Aoao o Samoa ni fusu’aga sa lotolotoi ai nisi o fanau tama talavou o loo a’o’oga i le iunivesite a le atunuu, ua oo atu nei i leoleo lea fusu’aga mo le faia iai o se su’esu’ega atili.
Ae i se faamatalaga ua faalaua’itele mai e le pulega o le iunivesite ua faailoa ai, e lua matāupu i feteena’iga o nisi o fanau a’oga e eseese taimi na tutupu ai o loo aga’i iai se su’esu’ega faalotoifale a le vaega o le iunivesite e fitoitonu ma matāupu faapea.
E sefuluvalu fanau o loo masalomia sa auai i ia feteena’iga ae o le taimi nei e sefulutolu tama talavou ua latou faailoa atu lava lo latou iai i le taimi o ia feteena’iga.
O le ata video mai se telefoni feavea’i sa salalau i le api o foliga sa faailoa ai se tasi o vevesi o loo molimauina ai ni fusu’aga i le va o nisi o tama a’oga ae ua fesoasoani lea ata video ma ata mai meapu’eata CCTV a le Iunivesite i le su’esu’ega o loo faia.
O fafo mai o le fale Samoa o le iunivesite e pei ona iloa i le ata video, na tupu ai le vevesi.
O le su’esu’ega a le iunivesite e sa’ili le māfua’aga ua iloa ai o le Aso Faraile ua mavae na amata ai le feteena’iga ina ua lafo e se tama a’oga se upu masoā a o iai se tuafafine o se alii a’oga, ae o le Aso Lua o le vaiaso nei na toe faifai tetele ai ma osofaalava ai isi tama a’oga ona ua aafia nisi o a latou uo i le vevesi.
O nisi e pei ona faailoa i le pepa o faasalalauga na faato’ā manino i le amataga o le vevesi ina ua latou iloa le ‘au o le paipa.
Le ‘au lea o le paipa ua oo i leoleo mo se isi su’esu’ega au’ili’ili.
Ua faailoa lava i le faasalalauga, o tulafono faatonutonu ma ta’iala a le iunivesite aoao a Samoa e faailoa uma i fanau i le taimi e lesitala ai mo le a’oa’oina i totonu o le Papaigalagala ina ia latou usita’ia.
O le itu mautinoa e pei foi o tulafono a isi a’oga uma i le atunuu, e matuā sā tapu tapu ona faamisa pe faatupu ni gaioiga solitulafono i totonu o le laumua, o le toa’iga o a’oa’oga faaauau a fanau a le atunuu, e pei ona tapua’ia e mātua ma aiga ina ia i’u manuia le sa’iliga o le poto ma le atamai i le maua o se tusipasi ma se faailoga maualuga.
