O le faailoa ai i lipoti o se faai’uga a le Pelesetene o le malo o Amerika e faia ai se galuega o le eliina o le alititai o le gataifale o motu tuaoi o le Atu Samoa o loo pulea e lea malo tele le teritori o Amerika Samoa, ua ave ai se fautuaga a le ta’ita’i o le Itu Agai i le faigāmalo o Samoa ina ia silasila toto’a i lea fuafuaga.
O le finagalo o le ta’ita’i o le Itu Agai le susuga Tuilaepa Lupesoliai Sailele Malielegaoi i le feiloa’iga masani ma tusitala i le Aso Tofi, e māfua mai i taimi a o avea ma Palemia sa talanoaina ai le matāupu i le tuaoi o Samoa ma Amerika Samoa lea na ia faaalia i lea feiloa’iga, e oo mai i le taimi nei e le’i mautū se ta’otoga o lea matāupu.
Le ta’ita’i o le Itu Agai, susuga Tuilaepa Lupesoliai Sailele Malielegaoi i le feiloa’iga ma tusitala.
Ua faaalia i lipoti le avea o le faai’uga a le Pelesetene o Amerika e eli le 31 miliona eka o le alititai o ogasami o Tutuila ma Manu’a ma matāupu ua faailoa ai finagalo tetee o tagata o le teritori.
O lea galuega o le a sa’ilia ai ni alaga’oa e maua i le alititai o ogasami o ia motu tuaoi o le Atu Samoa.
