Ua toe tuuina mai leoleo se faasilasilaga i tagata lautele e silafia le tamā ma le fanau Marokopa o loo tau sailia pea, a o toe 5 ai aso o totoe ona faalēaogāina lea o le taui tupe tele e $80,000.
O le masina o Tesema o le tausaga 2021 lea na amata su’e mai ai Tom Phillips ma lana fanau e toatolu, e masalomia ai Sisifo o Waikato, peitai e oo mai i le asō e lei maua lava.
Ua ofo mai ai e leoleo le taui tupe e $80,000 ina ia uuna’ia ai tagata lautele e fesoasoani atu ia latou suesuega i totonu o le piriota e lua vaiaso, ma talu mai ona ofo mai lea taui tele ua silia ma le 40 lipoti ua faaoo atu.
E lē o mafai ona faalauaitele mai e leoleo lipoti ua umia nei, na ona toe valaau mai e fesoasoani atu i suesuega faaauau ma o le Aso Lua o le vaiaso fou lea e toe ave ai e leoleo le latou $80,000 pe a oo atu e lei maua lava Phillips ma lana fanau.
Puna o Faamatalaga: https://www.1news.co.nz/2024/06/20/80k-reward-for-missing-marokopa-children-set-to-expire/
