Ua toe taliu mai i le atunuu le Minisita o le Matāgaluega o Tiute ma nisi o le pulega o le matāgaluega e aofia ai le Ofisa Sili, ina ua mae’a le vaiaso sa latou asia ai nofoaga o loo leoina ai tuaoi o Niu Sila e pei o malae vaalele ma luga o uafu, i le faamoemoe e galulue faatasi auaunaga a Matāgaluega o le Tiute a atunuu e lua.
Ua faailoa e le Matāgaluega o le Tiute i Samoa i se pepa faalauiloa, o le tāua o lea asiasiga ona o le a saga faamalosia ai le siitia o le galulue faatasi ma fetufaa’i tomai o tagata faigaluega i le faatinoga o galuega e puipuiamalu ai tuaoi o atunuu mai faigā solitulafono e pei o le feavea’i o fuālaau faasāina, ma gaioiga o solitulafono e taupulepule lona faatinoina poo organized crimes.
O se tasi lea o galuega ua soosootau’au ai atunuu o le Pasefika ona o le saoasaoa o ia faigā solitulafono ua aafia ai atunuu aemaise i le feavea’iina o pauta ma fuālaau faasāina.
Sa feiloa’i atu le Minisita o le Tiute le tofa Masinalupe Leatuvao Makesi Pisi Masinalupe ma lana ‘aumalaga i le Minisita o le Tiute o Niu Sila faapea sui o le Matāgaluega o le Va i Fafo o lea malo mo talanoaga faavaomalo poo bilateral talks, a o iai i Niu Sila mo lea asiasiga i le vaiaso ua mavae.
