Ua faamaonia mai i ripoti a le NZ Herald, le faaauau ai ona tuli o le faasalaga a se tasi o alii e to’alua iai ē na molia i le maliu o se alualutoto 18 masina, e igoa ia Nia Glassie.
Na tula’i Michael Curtis, 39 tausaga le matua, i luma o le Komiti o le Palola i lenei vaiaso.
E ui e le‘i talosaga aloa’ia mo le tatalaina i tua, ae na faamauina le amata faatulaga ai e le komiti o fuafuaga mo galuega fuata’i mo se amataga fou – o le soifuaga i fafo atu ma le falepuipui; e pei ona māua e tatau ona mae’a a o le‘i toe iloiloina lana matāupu ia Ianuari o le tausaga 2028.
Ua lata nei i le 19 tausaga o tuli le faasalaga o le alii o Michael, ina ua faamaonia ma faasala e soloatoa i le to’ese i la’ua uma ma lona uso o Wiremu i le fasioti tagata faamoemoeina poo le murder, e pei ona aafia ma maliu le Nia Glassie i Rotorua i le tausaga e 2007.
Faailoa e le Komiti o le Palola, le telē o le suiga i le alii o Michael i totonu o le 18 masina, i tulaga o amioga faaalia.
Ta’ua foi e lana loia, o se tagata ua tele ina vaaia le agai iai o le to’atele ma o loo faatumauina pea lona galue ai i totonu o le to’ese, ma ua tele polokalame toefuata’ina ua auai ai lenei alii.
Ta’ua e nisi o sui galulue i le falepuipui, o Michael o se tagata e faaaloalo tele ma e maitauina le taumamao o lea alii mai faafitauli e ono tula’i mai i totonu o le falepuipui.
E ui i ni tulaga lelei ua vaaia i le alii o Michael, ae ua faaalia finagalo le komiti e mana’omia pea ona ia faamae‘aina nisi polokalame toe fuata’ina, tapena ni fuafuaga e fesoasoani atu ia te ia e taofia ai o ia mai lona toe solia o se tulafono, ma siitia atu i se vaega o le falepuipui e tapenapena ai lona tagata mo le toe aga’i i fafo, a o le‘i iloiloina lona avanoa e tatala ai.
I le taimi nei, o loo tumau pea lona uso o Wiremu Curtis i le falepuipui ma ua fuafua e toe tula’i i luma o le Komiti o le Palola i le masina o Fepuari o le tausaga fou.
Puna o Faamatalaga: https://www.nzherald.co.nz/nz/nia-glassie-killer-michael-curtis-from-rotorua-to-stay-in-prison-after-parole-review/L2ZE6WQJWVAWHIGXBIJ7UNH6BU/
