Ua iai nei le talosaga a le Loia Sili a le malo mo le itu a leoleo e taofi le su’esu’eina o le talosaga a le faipule o Faleata 3 le tofa Lealailepule Rimoni Aiafi lea o loo finau ai e toe iloilo le faai’uga sa lē mafai ai ona faamaonia moliaga o le Palemia ma isi e to’alua sa tuua’ia i le taupule e natia le faia o le amiotonu ma le moliaga o le faia o talataufaaleaga.
O lea faai’uga na fofogaina i le masina o Mati o le tausaga nei ina ua mae’a su’esu’e molimau o le faamasinoga sa molia ai ma Samuelu, Sivai, ma Lise e māfua ona o le aafia o le ola o le alii talavou o Tuuau Faasavalu i se faalavelave tau taavale i Vaitele Uta ia Aperila o le tausaga e 2021 lea sa laumanu’ia ai le suafa o Lealailepule.
O le faai’uga na tuuina mai e le faamasinoga o loo faamamā ai le suafa o le faipule i se aafiaga i le faalavelave tau taavale.
O le talosaga a le Loia Sili e taofi le talosaga a le faipule o Faleata 3 o loo finau ai e toe faia se iloiloga poo se review a le faamasinoga i le faai’uga, o le a su’esu’eina i le aso 4 o le masina o Setema o le tausaga nei, ma o le a faatautaia e le afioga i le faamasino o Justice Rhys Harrison mai Niu Sila.
O lea foi matāupu tau faamasinoga o loo iai ma se finauga e toe iloilo pe apili le faai’uga, peita’i ua faailoa i taualumaga a le faamasinoga i le Aso Gafua, e le’i tuuina atu se pule faataga a le Loia Sili e avanoa ai ona tagofia e le faamasinoga se apili.
Mo le silafia e lē o iai se talosaga a le Loia Sili sa tula’i mo le itu a leoleo a o su’esu’eina moliaga o le Palemia ma isi e to’alima ina ia toe iloilo pe apili le faai’uga.
O se tasi o mau o loo faavae ai le talosaga a Lealailepule Rimoni Aiafi ina ia toe iloilo le faai’uga a le Faamasinoga Faaitumalo, ona o le finauga e pitotasi ma faaitu’au.
