O le lipotia ai o le faaitiitia o fuālaau ma vai e maua i le auaunaga a le Matāgaluega o le Soifua Mālōlōina ona o le tuai taunuu o ia vaega tāua mo le togafitia ai o gasegase eseese, aemaise o fuālaau ma vai mo gasegase o le suka ma le toto maualuga, ua faailoa ai e le Minisita o lea matāgaluega a le malo, o lea ua faaitiitia i le 30 pasene le tulaga faaitiitia o le maua o vai ma fuālaau.
O le lalago mai o se auaunaga i Fiti ua vave maua ai vai ma fuālaau, o se isi lea o faamāmā avega, ae ua faaopoopo iai ma le galulue faatasi o le Matāgaluega o le Soifua Mālōlōina ma faletalavai tuma’oti i totonu o le atunuu.
Ua faailoa foi e le Minisita o le matāgaluega, le tofa Vaaaoao Salumalo Alofipo, o aitalafu e māfua mai i le faatauina o ia vaega tāua o le auaunaga faalesoifua mālōlōina ua faaitiitia i le 50 pasene.
Sa maua se avanoa o tusitala i le Minisita ma fesiligia ai i lea tulaga.
Sa faailoa lea finagalo o le Minisita o le Soifua Mālōlōina, ina ua mae’a le sauniga ua tauaao ai e le matāgaluega le fesoasoani o meafaigaluega mo le faatinoina o polokalame e fesoota’i i aiga fuafuaina poo le family planning sa tuuina mai e le faalapotopotoga a Malo Aufaatasi e fitoitonu ma ia polokalame, le United Nations Population Fund poo le U.N.F.P.A.
Le afioga i le Minisita o le Soifua Mālōlōina le tofa Vaaaoao Salumalo Alofipo.
