Ua sauni atu nei le Hurricanes i le Grand Final ma le ‘au malosi a le Chiefs i le faai’uga o le vaiaso nei e sa’ili ai le siamupini o le taamilosaga a le Super Rugby Pacific 2026.
O le faato’ā toe oo lea o le Hurricanes i le final talu mai le 10 tausaga talu ai, i le 2016 na su’e siamupini ai ma le ‘au a le Lions mai Aferika i Saute, ma manumalo ai le Harricanes i ‘ai e 20 i le 3 a le Liona.
E mata’ina foi lenei taamilosaga, ina ua su’e uma e ‘au a Niu Sila semi finals; e pei ona semi final le Crusaders ma Chiefs ma manumalo ai le Sifi, ae semi final le Hurricanes ma le Blues a Aukilani lea ua manumalo ai le Hurricanes i ‘ai e 57 i le 21.
O se taaloga mata’ina na iai i le afiafi o le Aso Faraile talu ai, ma i le ‘afa muamua na vaaia le taufai finau o ‘au uma e lua, e uma le ‘afa muamua o loo vavalalata lava ‘ai, e 19 le Hurricanes i le 14 a le Blues.
Peita’i o le toe foi mai i le ‘afa mulimuli, o iinā na vaaia ai le osofa’i maloi a le matagi, ma oso maualuga ai loa o latou ‘ai se’ia oo ai lava ina ili le fā’ili a le laufalī ua mae’a le taaloga, ua manumalo le Hurricanes i ‘ai e 57 i le 21 a le Blues.
O le Aso Toonai nei, 20 o Iuni i le 7pm i le afiafi o le a faia ai le Grand Final i le malae o le Hnry Stadium i Ueligitone.
Puna o Faamatalaga: https://www.rnz.co.nz/news/sport/598114/super-rugby-pacific-hurricanes-storm-into-grand-final-with-brilliant-win-over-blues
