O se fuafuaga a le Exclusive Brethren e fausia se maota o le ekalesia, church hall i luga o se tasi o magaala i Havelock North ua tetee iai nisi e aumau i lea faaitu ma fesiligia ai faamoemoega o lea kulupu.
Fai mai le Stuff.co.nz o le The Hastings Gospel Trust Incorporated ua talosaga i le Pulega faaitumalo a Hastings mo se ioega e fausia ai lea nofoaga ma se kapaka i le 32 Reynolds Road.
Ua faailoa i le lipoti o le nofoaga lea sa faatau e sui o le ekalesia mo le $855 afe ia Tesema 2021.
Fai mai le lipoti o le maota o le ekalesia o loo fuafua e fausia o le a faaaoga mo sauniga lotu i taeao o Aso Sa aemaise nisi o polokalame a le ekalesia.
O le finau tetee a i latou mai lea faaitu e agai i le pa’ō poo leo mai sauniga aemaise fai mai i latou o le magaala lea e mo tagata e nonofo ai, residential area ma e le o iai nisi o lea magaala e lolotu ai.
Fai mai le taitai o le ekalesia lea e lei iai ni tetee faapea sa feagai ma latou muamua i isi nofoaga ua faatū ai a latou tapuaiga ma o latou o tagata Kerisiano.
O le aso 21 o Iulai o le a fofoga ai le mataupu lea i luma o le Council.
