Ua toe amata foi ona alia’e mai le isi lea faafitauli o tagata o loo faia lenei amioga mata’utia o le taumafai e susunu fale, faapea foi i nofoaga faitele poo ni pisinisi foi.
O le po anapo lea na pisi ai le auaunaga a le tineimū i le taulaga o Aukilani ina ua lipotia ane i le latalata i le 11pm i le po anapo, se afi ua amata ona mū ai le nofoaga lea i le totonugalemū i le aai e faataunuu atu iai nofoaafi, le Waitēmata station, lea sa ta’ua muamua o Britomart.
Na vave ona toe tapē lena afi ma e leai se soifua na āfaina, ae iai le talitonuga o leoleo, o nisi o tupulaga talavou o loo aafia i le faatupuina o lena mū.
Mulimuli ane a o le’i ta le 1am i le vaveao analeila, na lipotia ane ai foi se isi mū o se faletaavale i Point Chevalier, ma faatama’ia ai se vaega o lea faletaavale.
E lua ni loli a le fuimū na faavave atu iai, ma e ui e le’i aumaia se faai’uga mautū o le faapogai o lea mū, ae o se tagata pu’eata mo le NZ Herald na iai o loo ia ta’ua ai e foliga o i latou na faapogaia lea mū na vaaia le tamomo’e ese, ma e le’i umi ae taloka mai ai e leoleo ni tagata na maua i se shopping center e lata ane iai.
Foliga mai e leai se tasi na nofoia lea fale na aafia lona garage, auā e leai se lipoti o nisi na faamanu’alia.
E to’alua la i la’ua ia ua molia ma o le a tutula’i i luma o le Faamasinoga Faaitumalo a Aukilani i le asō i moliaga o le susunufale ma le loto iai, o ni alii e 26 tausaga le matua o le isi, ae 50 tausaga le matua o le isi alii.
Ae o le te’a foi o le 1am i le vaveao lava analeila, ae toe alu ane foi se isi lipoti i se fale na mū i Otara.
O se fale fogafaletasi, ma e oo atu le vaega a le tineimū ua matuā telē se vaega o lenei fale ua faatama’ia e le afi, ma e le’i mautū tonu le māfua’aga o le mū.
E lima loli a le fuimū na o atu e tau tineia lenei mu, ma sa mafai ona maua uma tagata sa nofoia lenei fale ma faia iai siaki ina ia faamautinoa lo latou saogalemū.
O loo faagasolo uma nei su’esu’ega i nei faalavelave faafuase’i.
Puna o Faamatalaga: https://www.nzherald.co.nz/nz/auckland/multiple-suspected-arson-attacks-in-auckland-arrests-made/AZWAHCUMQNHYROEJUJ3Q4F4OME/
