Ua faamaonia e le Kapeneta le faatofāla’iga a le Ta’ita’ifono ma le Komiti Faatonu a le faalapotopotoga o faaputugatupe mo se lumana’i manuia o Samoa, le NPF, mo le faamanuiaga e ao ona totogi atu i le latou ‘aufaisaofaga, le aofa’iga e 10% mo lenei tausaga faaletupe.
E pei ona saunoa le afioga i le Tama’ita’i Sui Palemia i se feiloa’iga ma le ‘autusitala i le asō, o ia foi o le Minisita o le NPF, ua mae’a ona totogi atu le 4% ia Fepuari 2026, ae o nei la lea na faasilasila ai loa le faamae’a mai o le 6% na totoe mai le 10% na faamaonia.
O le tau aofa’i o le 6% o le tului faameaalofa, e $61 miliona tālā.
O le vaevaeina o le faamatuu mai o le 6% e pei ona saunoa le Minisita o Tupe, le afioga Mulipola Anarosa Ale-Molioo, o le a tuuina sa’o atu le 3% i sui faisaofaga e ala i seleni poo le cash payout, ae o le isi 3% o le a tuu atu i totonu o saofaga poo le deposti i totonu o le member’s account.
Mo sui faisaofaga o loo iai a latou aitalafu tuua, na faamalie mai le tama’ita’i minisita, o le a faaaogā a latou saofaga e totogi ai nei aitalafu tuua.
O le ta’ua o le alu sa’o o le saofaga i aitalafu tuua, na faamanino e le tama’ita’i Pule Sili o le NPF, Lemalu Selesitina Meni-Reti, o i latou ua oo aitalafu i le latou legal department, o i latou tonu na o le a aafia a latou tului o faamanuiaga ma o le a aga’i sa’o lava mo a latou aitalafu o loo iai i le vaega o le legal; ae mo i latou o loo iai aitalafu i le vaega o le lending, e lē o aafia ai.
E 3 masina e faaalu e tuuina atu ai nei saofaga, ma afai e uma le 3 masina e le’i talaina le pasene a nisi sui faisaofaga, ona tuu loa lea i totonu o a latou saofaga e faaauau ai le faaputuina o a latou seleni.
Na saunoa foi le Ta’ita’ifono o le Komiti Faatonu a le NPF, le afioga Tagaloa Eddie Wilson, ua mae’a foi ona faataatia le 5 Years Strategic Directives o le tulaga ua iai ni policies fou e limata’ita’ia ai le Fono Faatonu auā atina’e i le faaleleia atili o seleni maua a le ‘aufaisaofaga ae faapea foi i atina’e a le malo auā le aga’i i luma.
O le a amata faamatuu mai lenei faamanuiaga i le Aso Faraile, aso 3 Iulai 2026.
