A o tālia le taimi e galue ai i Samoa se foma’i mai Niu Sila e faia su’esu’ega faapitoa e sa’ili ai māfua’aga o maliu i se totogi talafeagai mai faamāmā avega i le Matāgaluega o Leoleo Falepuipui ma le Toe Fuata’ina, ua mae’a ona faatino e se foma’i o se pathologist mai Ausetalia le galuega fesoasoani i se taimi vave na mana’omia ai lea auaunaga mo le faia o ta’otoga e sa’ili ai māfua’aga o le maliu mo tino maliu e fā sa moomia le faia o ta’otoga.
O lea foma’i na tali i le valaau mo le faia o lea auaunaga ia totogi ai lava e ia lona malaga mai i Samoa ma ua momoli ai le faafetai a le Loia Sili ma le matāgaluega o leoleo i le galuega fesoasoani a Dr Paul Botterill ona o se tasi lea o vaega tāua e mana’omia tele i su’esu’ega a leoleo.
Mo le silafia o le faia o ta’otoga e sa’ilia ai māfua’aga o le maliu o se tagata o se galuega e faatino i le faatonuga a le pule o maliu poo le coroner ona o le taunuuga o se ta’otoga faapitoa e mana’omia i su’esu’ega a le faamasinoga e sa’ilia ai le māfua’aga o le maliu o se tagata o loo iai masalomia e aafia ai ni gaioiga solitulafono.
