Ua faamaonia i se lipoti mai leoleo, o si alualutoto lea na maua lona tino i autafa o se auala i se faaitu maotua, na uma lava lona ola i totonu o le manava o lona tinā a o le’i fanau mai.
O le aso 19 o le masina talu ai o Me, na maua ai e se tagata faigaluega o se ave masini le tino o lenei pepe i le Wairau Bar Road, e latalata i Spring Creek.
Na ta’ua e le ta’ita’i leoleo asiasi i le faaitu o Marlborough, Simon Feltham, o se ta’otoga na faia i le tino maliu o lenei alualutoto na iloa ai, na uma lava lona ola i totonu o le manava o lona tinā a o le’i fanau mai.
Ta’ua e Feltham, o loo faatagisia e leoleo le aiga o lenei pepe ina ia aga’i mai e faailoa mai i latou, ona o loo iai atugaluga i le soifua mālōlōina o le tinā o le pepe.
“E matou te fia faamautinoa o loo saogalemu le tinā o le pepe, ma e mafai ona avatu ia te ia se fesoasoani talafeagai poo se togafitiga o loo ia mana’omia.”
O le isi itu o loo fia maua ai e leoleo se fesoota’iga ma le aiga o le pepe, ina ia talanoa poo le ā se fuafuaga e tatau ona fai i le tino lea na maua o le alualutoto.
Afai o oe e ana le pepe poo e silafia foi ni faamatalaga o lenei matāupu e ono fesoasoani i le galuega a leoleo i le tau sa’ilia o le tinā o le pepe poo nisi o lona aiga, ia faafesoota’i mai la latou auaunaga numera 105 i le telefoni poo le upega tafa’ilagi o le 105.police.govt.nz ma tuu iai le numera o le faila o le 260519/9172.
Puna o Faamatalaga: https://www.rnz.co.nz/news/community/598246/baby-whose-body-was-found-on-side-of-rural-road-was-stillborn
