Ua faailoa nei e le alii faia’oga ulu o le ‘au a le Moana Pasifika, Faalogo Tana Umaga ‘o le a ola pea le agaga tutū faatasi o tagata Pasefika, e ui foi i le fetaia’i o le kalapu ma faafitauli.’
O le faamatalaga lea a le alii faia’oga o le ‘au i le mae’a ai o le taaloga a le Moana Pasifika ma le ‘au a le Reds i le faai’uga o le la vaiaso i Albany.
E ui i le malolo ai o le ‘au i ‘ai e 31 i le 33 a le Reds, ae na faaalia e Faalogo lona faafetaia o tama taaalo ma a latou taumafaiga, e lē gata i lea ae o le ‘aulagolago i soo se taaloga lava, e aga’i atu ma le agaga fiafia e tapua’ia faiva o tama taaalo.
Na iai le talitonuga o le a faai’u le taamilosaga a le Moana Pasifika i se manumalo peita’i ua lē tau lau o le faamoemoe na taumafai atu iai i le la taaloga ma le Reds.
I le uma ai o le taaloga, o lea na molimauina le omai faatasi o tama taaalo, o sui o le pulega faapea le alii faia’oga ulu o Faalogo Tana Umaga e faai’u le latou mafutaga faatasi ma le ‘aulagolago, o uo ma ē masani e ala i pesepesega ma siva Samoa e faamautūina ai lo latou taumafai e faailoa le tāua o le aganuu ma sootaga faaleaganuu.
Ta’ua e ui i le lē mautonu ai o se tulaga o iai le Moana Pasifika, ae ua faaalia e le faia’oga ulu ia Faalogo, o loo iai pea le faatuatuaga i tama taaalo ma le pulega i le maua ai o se tali i se taimi lata mai.
Puna o Faamatalaga:https://www.rnz.co.nz/news/sport/596145/there-s-nothing-else-like-this-anywhere-umaga-on-moana
