Ua mae’a iloiloga a le laulau o faamasino o le Faamasinoga o Talosaga Apili a le Faamasinoga Maualuga i le talosaga a le sui faipule o Falealili 1, ma ua faailoa mai o le Aso Gafua a sau e fofogaina ai lea faai’uga.
O le vaiaso muamua o le masina nei o Iuni sa tauaofia ai lea faamasinoga e pei ona sa malaga mai Faamasino e to’atolu ma loia mai fafo mo le faatautaia o iloiloga, lea na mae’a i le lua vaiaso ua mavae.
O le faai’uga ua faatalia nei o le a iloa ai le talia ma le lē talia o le talosaga o loo autū i le aafia o aiā tatau faalefaavae o le sui faipule i le faai’uga a le Faamasinoga o Faigāpalota na faamaonia ai le moliaga e tasi o le faia o faiga faaālatua i le faatosina o se tagata palota.
Sa autū lea finauga i le tulaga sa faafoe ai e le faamasinoga lana pitolaau i le su’esu’eina o le moliaga o le faia o se gaioiga faaālatua e aunoa ma le iai o ni molimau e oo atu e faia a latou molimau tuufofoga, ae faaaogā molimau tusitusia ua mae’a ona faatautō.
I se tasi o matāupu tau faamasinoga e faasino lava i le tagi tau palota mai Falealili 1, o le Aso Faraile o le vaiaso nei ua faatulaga e aumai le faai’uga i su’esu’ega o moliaga o le faalemigao i le faamasinoga le contempt of court sa molia ai nisi o molimau sa lē usita’ia le poloa’iga e oo atu e faia a latou molimau tuu fofoga.
