O le saini faamalosi e se tasi o se suafa o se isi tagata i le faamoemoe e faamaonia ai ni faamaumauga o se tagata palota e fia lesitala i se itumalo palota, o se solitulafono matuiā o lona faasalaga pe a faamaonia e 10 tausaga i le falepuipui.
Peita’i mo se tasi o tagata faigaluega a le malo sa galue e fesoasoani i le lesitalaina o tagata palota a o lumana’i le palota tele ia Aokuso o le tausaga ua mavae, ua faasala i le 160 itula e galue fua ai i le sosaiete o le gasegase o le kanesa poo le Samoa Cancer Society.
O le masina o Me ua mavae atu nei na aumai ai lea faasalaga a le Faamasinoga Maualuga ina ua faamaonia le moliaga o le saini faamalosi o le suafa o se tiakono o loo galue i se Ekalesia Katoliko i le afio’aga o Salelesi, e se tagata faigaluega a le malo sa fesoasoani i le faia o le lesitala o tagata palota i le ofisa o le komisi o faigāpaplota.
O le faai’uga tusitusia a le faamasinoga o loo faailoa ai, o Maselina Ulupano o loo galue i le ofisa o le Faalapotopotoga o Mavaega Tausi a Samoa le UTOS, sa ia faia le lesitala o Patelesio Eneliko o lona tuagane.
E iai pepa o faamaumauga e mana’omia mo le faia o le lesitala e aofia ai ma le tusi faamaonia mai se faifeau o le nuu.
O le tusi lea na saini e lē ua molia ma māfua ai ona molia i le moliaga o le forgery poo le saini faamalosi o se suafa o se isi tagata i se faiga solitulafono.
O lea pepa na sainia i le aso 4 o Iuni o le tausaga na te’a nei ae na tuuina atu i le ofisa o le komisi o faigāpalota mo le faia o le lesitala i le aso 4 o Iulai o le tausaga lava na te’a nei a o lolofi atu le to’atele o tagata palota e lesitala mo le palota tele.
O lē na molia ua 31 tausaga o le soifua ma sa galue muamua i le faalapotopotoga o Inisiua a Samoa a o le’i suia lana auaunaga i le malo i le Faalapotopotoga o Faaputugatupe o Mavaega Tausi a Samoa.
