O le toe filifilia o le Onomea Productions e na te tapena le polokalame atoa o le sa’ilia o se tama’ita’i o le atunuu e avea ma Tausala o Samoa, ua faailoa ai e lea auaunaga tuma’oti le tatala ai nei o le avanoa e lesitala atu ai ni tama’ita’i mo lea tauvaga e faia i le masina o Setema.
Ua faailoa i le faasalalauga o le amata o le lesitala, o le kamupani telefoni o le Digicel o loo avea ma lagolago autū o le tauvaga o le Tausala Samoa o lenei tausaga.
O le tauvaga i le tausaga na te’a nei e to’a sefululua tama’ita’i na sa’ili ai se Tausala o le atunuu lea na manumalo ai le tama’ita’i o Iliganoa Feagaimaalii Soti o loo tauaveina nei le pale o le Tausala o Samoa.
