Ua amata ona maua e tagata o le itumalo o Safata faamanuiaga tau tupe o le taui e 10 miliona ona o aafiaga o le soifuaga masani i le goto o le manuao o le malo Niu Sila i gataifale o le itumalo talu mai Oketopa o le tausaga e 2024.
I le Aso Lulu le aso muamua o Iulai na amata oo ai i teugatupe a tagata le ta’i afe selau tālā ua silia i le miliona tālā le tupe ua faamatuu atu mo lea taui.
O lea aofa’iga e ono miliona ua maua e le 5 afe 524 tagata e pei ona faailoa e le komiti a le malo e feagai ma galuega fesoasoani i ni aafiaga o le gataifale o le atunuu mai ni suāuu masaa.
Le afioga Lealaisalanoa Frances Brown Reupena o le sui o le komiti.
Ae i le amata maua o le taui tupe mo Safata e silia i le 11 miliona ua faasafua ai, e māfua i le faaopoopo o le numela o tagata o le itumalo e agavaa i le taui.
Ua faamaonia atili mai e le komiti faufautua o le gataifale a le malo, o le miliona ma ona tupu ua faaopoopo ma faatumau ai i le tasi le afe selau tālā le taui sa aumai i tupe na totoe o le lima miliona muamua na aumai e le malo o Niu Sila mo tapenaga ina ua faato’ā tupu le faalavelave ma goto ai i gataifale o Safata le manuao o le Manawanui.
O le faai’uga o le masina lenei o Iulai o loo fuafua e tatau ona mae’a ai le tuuina atu o le taui tupe mo Safata.
Mo le itumalo o Siumu ua faaalia e le ta’ita’ifono o le komiti faufautua o le gataifale e fai si umi o faatalatalanoaga ma feutana’iga ae ua faatulaga foi e maua e le tagata e to’atasi o lea itumalo le taui e tasi le afe selau tālā.
Le ta’ita’ifono o le komiti faufautua o le gataifale le afioga Fui Tupa’i Mau Simanu o le Ofisa Sili foi o le Matāgaluega o Galuega Tetele a le malo.
