O loo i Samoa i le vaiaso nei sui faipule e to’alua o le Senate o le malo o Farani i se malaga ua autu i le fia sa’ili’ili ma fia silafia o tulaga o upufai o malo i lenei vaega o le Pasefika.
O le Aso Lulu na feiloa’i ai ia sui faipule o le senate mai lea malo ma le Fofoga Fetalai o le Palemene, ma le fuafuaga e feiloa’i atu foi i nisi o sui faipule o le tatou Palemene aemaise o sui o le malo.
O loo iai foi le faamoemoe e feiloa’i lea savali i sui o faalapotopotoga tuma’oti i lo tatou atunuu.
Ua faailoa e le ofisa o le amepasa o Farani i Samoa o le afea o le tatou atunuu o se tasi o polokalame a se faalapotopotoga o sui faipule o lea malo o loo galulue ma nisi o malo i le Pasefika i se taumafaiga e fetufaa’i silafia ma isi malo o le Pasefika i le faagaioia o pulega ma upufai o malo.
