Ua saunoa se tasi o tagata e tele lona silafia i le fausia ma le faatulagana o ata o fale, (architecture), e mana’omia e Aotearoa ona faato’atele sui faapea mai le Pasefika i le ituaiga galuega lea.
O Lealiifano Dr Albert Refiti ua lipotia e le RNZ o se polofesa o lea ituaiga galuega i le AUT ma ua tele tausaga o faia’oga ma galue ai i Aotearoa.
Fai mai a ia i le faatalanoaga ma le leitio faavaomalo a Niu Sila, o ia o se tagata e tupuga mai Samoa ma ua ia maitauina ua iai se kulupu o tagata talavou mai le Pasefika ua aga’i atu mo a’oa’oga i le iunivesite i le matātā lea ae o loo maualalo pea le aofa’i ae o se galuega tāua tele e faatulaga ai le ituaiga soifua e soifua ai le tagata.
Na ia ta’ua foi o le to’atele o nai o tatou tagata e aga’i i lea matātā o le tele foi lea o le avanoa e amata ai ona tatou faia faai’uga e fausia fale e talafeagai mo o tatou foi lava tagata.
O nisi o maota sa ia faamamafa i lana saunoaga o le Fale Pasifika i le Iunivesite o Aukilani ma le Fale Malae i Ueligitone, o ni nofoaga mo komiuniti Pasefika.
Puna o Faamatalaga: https://www.rnz.co.nz/news/pacific/641173/aotearoa-needs-more-pacific-representation-within-architecture-profession-leading-scholar-says
